أهلا بيكم في البوست التاني من موضوع:
إزاي أبدأ في مجال UX؟
في البوست اللي فات قلنا ان أول خطوة للدخول في مجال UX هو ضبط وتصحيح بعض المفاهيم.
علشان نعرف نمشي مظبوط ناحية أهدافنا في التعلم وتحديد التخصص المناسب واستهدافه صح.
وأول مفهوم وضحناه البوست اللي فات كان :
الفرق بين UX و UI
النهادرة هنتكلم عن تاني مفهوم وهو:
الفرق بين الأدوات TOOLSوالتقنيات TECHNIQUES& METHODS .
ودي مشكلة كبيرة بتحصل كتير حتى بين المتخصصين
وهي الخلط بين الأدوات والتقنيات
واختزال الموضوع كله في مجرد أدوات
طيب إزاي؟
لما ييجي حد من المبتدئين ويقول أنا اتعلمت اليستريتور وفوتوشوب وإكس دي كده أبقى UXديزاينر؟
طيب نجاوب على سؤال شبيه:
استخدامك لجهاز الضغط معناه انك بقيت طبيب؟
طيب استخدامك لبرنامج أوتوكاد ، يعني أنك مهندس؟
أكيد لأ
لأن دي مجرد أدوات ، محتاجة قبلها دراسة وأصول وقواعد ودماغ مؤهلة تقدر تستخدم الأدوات دي لتحقيق الأهداف.
لازم نفهم إن التصميم مهنة زي الهندسة والعمارة وليها مناهج وقواعد اسمها تقنيات.
وعلشان ننفذ التقنيات دي بنحتاج أدوات تساعدنا سواء كان قلم رصاص ومسطرة أو كان تطبيق.
فالأدوات تساعد في تنظيم الشغل وتصنيف النتايج وعمل إحصائيات وهكذا…
مثال:
مصمم الجرافيك مش اللي بيستخدم فوتوشوب أو اليستريتور و 15 برنامج تاني!
دي أدوات بيستخدمها مصمم الجرافيك وممكن يستخدمها مصمم الاعلانات ، مصمم الهوية البصرية ، الفوتوجرافر ، مصمم المواقع ، مصمم السوشيال ميديا … حتى المدرس لو حابب يكتب امتحان على برنامج منهم بدل الوورد فممكن عادي.
لكن مصمم الجرافيك هو اللي دراس مناهج وقواعد وتقنيات التصميم زي نظريات الألوان والنسب وهكذا …
وممكن يستخدم أي عدد من الأدوات اللي تخليه يعمل شغله ويوسع أدواته على قد ما يقدر حتى لو شايف أن الوورد والباور بوينت ممكن يعملوا إضافة لشغله فممكن يستخدمهم كأدوات.
ولو افترضنا ان شركة أدوبي قفلت، وانتهت برامج فوتوشوب واليستريتور ، فهل ده معناه انتهاء مهنة تصميم الجرافيك!
أكيد لا ، لكن ده معناه أن في أداة من الأدوات انتهت وبنشوف أدوات بديلة عادي نحقق بيها شغلنا.
وكده لما نتكلم عن مجال UX
ففكرة أنك بتعرف تتعامل مع برامج وتطبيقات زي إكس دي وفيجما واليستريتور وغيرهم، فدي أدوات مالهاش أي فايدة من غير فهمك لمناهج وتقنيات التصميم لتجربة المستخدم UX.
فكده نفهم أن ال UX مش برامج وتطبيقات
ال UX هو مناهج وتقنيات زي مثلا :
User & Stakeholder interview
Requirements & constraints gathering
Competitive analysis
Persona building
Writing user stories
Journey mapping
Wireframing & Prototype
Accessibility evaluation
Feedback & testing
وهكذا ، وكل تقنية من التقنيات دي ممكن نستخدم فيها أدوات مساعدة زي مثلا:
User & Stakeholder interview
ممكن نستخدم جوجل فورم أو سيرفي مونكي.
Persona building
ممكن نستخدم باور بوينت.
Wireframing & Prototype
ممكن نستخدم فيجما وأدوبي اكس دي.
أتمنى تكون وضح الفرق بين الأدوات والتقنيات ، علشان نقدر نقيم كويس جدا إحنا فين من المجال ده ومحتاجين نعمل إيه في خطواتنا الجاية.
تحياتي ليكم وإن شاء الله نكمل في البوست الجاي.
