من أكتر الأسئلة اللي بتتسأل لغاية دلوقتي لأي مبتديء في الـ UX هو أنه عايز يعرف تفصيليا معني UX وتخصصه إيه تحديد؟ وكمان التفريق بينه وبين UI والجرافيك ديزاين، أنا لحد النهاردة بشوف الأسئلة دي وكتير بشوف إجابات غير موفقة، فمن خلال مجموعة بوستات تعريفية بمجال UX هنجاوب على الأسئلة دي وأهلا بأي استفسارات في التعليقات…
في البوست ده هنجاوب ببساطة على أول سؤال:
إيه هو UX ؟
لو أنت قبل كده اشتريت أي منتج أون لاين
أو استخدمت أي موقع أو تطبيق خاص بطلب خدمة زي مثلا
انك تعمل أوردر من مطعم
أو تتابع حسابك في البنك من خلال تطبيق البنك
أو تحضر محاضرة أونلاين
فكده أنت اسمك مستخدم User.
لما تستخدم أو تتعامل مع الموقع أو التطبيق ده
كده أنت بتمر بتجربة مع الموقع أو التطبيق
سواء كانت هذه التجربة إيجابية أو سلبية
دي بنسميها تجربة Experience.
من هنا جاء مصطلح تجربة المستخدم User Experience
اللي هي اختصارها UX
يعني التجربة التي يمر بها المستخدم أثناء استخدامه لموقع أو تطبيق أو أي منتج رقمي.
والمنتج الرقمي اللي هو أي تطبيق أو موقع أو سوفتوير أو برنامج وهكذا.
فالعادي والمنطقي إن أي بزنس بيعمل تطبيق معين
بيكون هدفه أن يمر المستخدم بتجربة إيجابية ومرضية أثناء استخدامه للتطبيق
وبالتالي ده هينعكس بشكل ايجابي على تحقيق الغرض من التطبيق
وبالتالي تحقيق أهداف البزنس.
ومن هنا كانت أهمية دراسة وتحليل تجارب المستخدمين أثناء استخدامهم للتطبيقات.
علشان نقدر نحدد ايه احتياجات وخصائص المستخدم
وايه المشاكل والأخطاء في التطبيق
واللي بتظهر وبنعرفها من خلال استخدام المستخدم
وبالتالي نقدر نصمم التطبيق المناسب
ونصمم حلول تطور التطبيق وتحل أي مشكلات وأي أخطاء
ولما نحل المشكلات دي هنقدر نحقق تجربة أفضل للمستخدم.
وهنا لازم نفهم نقطة مهمة جدا
وهي ان تصميم أي موقع أو تطبيق بيتم عن طريق
أننا نعرف أفضل شكل من وجهة نظر المستخدم User
لأنه هو صاحب التجربة
وهو المستهدف من بناء التطبيق.
وده بيتم عن طريق البحث وتحليل سلوك المستخدم
فمن خلال البحث والتحليل
نقدر نلاقي الشكل الأفضل للتصميم
والحلول الأنسب لأي مشاكل في التصميم.
فالمستخدم هو محور اهتمام البزنس
وهيكون ضروري معرفة ايه أفضل الطرق اللي بيفضلها المستخدم -اللي هو الزبون-
أو عادة ما يسلكها
علشان يوصل لهدفه من استخدام التطبيق.
وعلشان توصل لأفضل الطرق دي و أفضل شكل للتصميم
كان لابد أن تكون أول خطوة لتصميم الموقع أو التطبيق
هو اننا نعرف احتياجات وسلوك المستخدم المستهدف ده
طيب ازاي هنقدر نعرف احتياجات وسلوك المستهدف؟
أكيد عن طريق البحث
ودي اول مرحلة من مراحل تصميم تجربة المستخدم.
المرحلة الأولى – البحث RESEARCH
علشان منضيعش وقت في تصميم تطبيق لا يناسب البزنس ولا المستخدم
ولا يحقق أي أهداف للبزنس
ولا يغطي احتياج العميل
فنضطر نبدأ من الأول
علشان نعرف فين المشكلات
وهنرجع تاني بالضرورة لمرحلة البحث
علشان نحل المشاكل.
لذلك لابد أن تكون البداية هي البحث
وأن لا نتجاهل الاستثمار في البحث.
المرحلة الثانية – تصميم الحلول PROTOTYPE
وفيها بنبدأ نصمم نماذج ومقترحات للتطبيق
بناءا على النتائج اللي وصلنالها في مرحلة البحث.
المرحلة الثالتة – الاختبار TEST
واللي فيها بنختبر النموذج ومدى فعاليته للمستخدم
وإذا كان فيه مشكلة نرجع للمراحل السابقة نحلها
وبعدها نرجع تاني للاختبار لغاية ما نعتمد التصميم النهائي للتطبيق.
ده مدخل بسيط لتعرفة إيه هو مجال التصميم لتجربة المستخدم UX ، وأهلا بأي استفسارات.
