اتكلمنا في البوست اللي فات عن : إيه هو UX؟
وفي البوست ده رقم 2 هنتكلم عن :
أهمية التصميم لتجربة المستخدم UX
وظيفة تصميم تجربة المستخدم تقديم تجربة مريحة للمستخدم.
يعني وهو بيستخدم التطبيق مش تايه ولا صعب يوصل لهدفه.
يعني اللينكات واضحة ، التنقل سهل ، يعني مش بيتوه ويتلخبط.
متصنف كويس لأقسام واضحة، وفي خريطة واضحة للتنقل.
كل عنصر سواء نص أو صورة أو زرار في مكان مناسب.
في أقل وقت وخطوات بقدر يحقق مهمته بنجاح.
ألوان وخطوط ومقاسات مناسبة لكل شاشة سواء PC او تابلت أو موبايل أو اي حاجة تاني.
الموقع مش بطيء أو تحميله صعب.
لو مستخدم عنده مشكلة في النظر أو السمع أو اللمس يقدر يلاقي طرق مختلفة للتصفح بما يناسب وضعه.
يعني مثلا لو مشكلة عند مستخدم مع الإضاءة والألوان الفاتحة يكون عنده إمكانية لقلب الشاشة لنظام Dark Mode
فيقدر يتصفح بسهولة ومن غير إرهاق.
لو حد نظره ضعيف أو ضعيف في القراءة، هيقدر يلاقي طريقة للتصفح بالاستماع… وهكذا.
العملية كلها مسألة تنظيم وترتيب التطبيق بما يناسب دماغ وسلوك المستخدم المستهدف.
يعني الطريقة اللي هو بيفكر بيها وبيتفاعل بيها هي أنسب قرار لتحديد شكل التصميم.
حتى ولو ده مش متفق مع ميولي الشخصية كمصمم .
لكن أنا مش بصمم لنفسي وأنا مش طرف في الموضوع .
فمينفعش أدخل رأيي في الموضوع إلا في حدود شغلي كمصمم مش كمستخدم.
كده نقدر نقول :
من غير بحث فإحنا بنتجاهل المستهدف الرئيسي اللي هو ممكن يكون مختلف عن المصمم عقليا وسلوكيا.
التصميم بالشكل ده مش بيخاطب المستهدف وبذلك مش هيعجبه ومش هيستخدمه بالشكل الأفضل ليه، حتى لو استخدمه مش هيحقق أقصى استفادة مطلوبة زي لو كان التطبيق اتصمم بناءا على دماغه وسلوكه هو نفسه.
كده نقول ان البحث لتجربة المستخدم هيتسبب في الآتي على سبيل المثال مش الحصر:
انخفاض تكاليف الدعم الفني وخدمة العملاء عارف ليه؟
لأن مبقاش في كمية المشاكل اللي بيواجهها المستخدم وتخليه يضطر يكلم خدمة العملاء كل شوية.
ارتفاع المبيعات لأن استخدام التطبيق سهل فبيخلي المستخدم مهما كان كسول يستخدم التطبيق ويعمل أوردر أو مبيعات…
تطوير البراند والولاء للعلامة التجارية نتيجة استخدام المستخدم للتطبيق كتير والاعتماد عليه واحساسه انه بقي جزء من يومه، غير انه بدأ يوصي بيه لناس تانية من سهولته وسلاسة تحقيق الهدف منه.
دي نبذة مختصرة عن أهمية UX واننا مينفعش نتخطى المرحلة دي وندخل لتصميم واجهة المستخدم علطول.
ونتقابل في البوست الجاي ان شاء الله عن : مراحل التصميم لتجربة المستخدم.