اتكلمنا في الـ 3 بوستات اللي فاتوا عن:
- إيه هو UX؟
- أهمية UX.
- مراحل تصميم UX.
في البوست ده هنبدأ نتكلم عن:
إزاي تبدأ في مجال UX؟ والفرق بين UX و UI
وده هكون في أكتر من بوست.
علشان نتكلم عن إزاي أبدأ في مجال UX ، لازم الأول تحدد إيه UX اللي انت تعرفه وفاهمه، علشان تعرف هو ده اللي انت عايزه ولا تقصد حاجة تانية، وعلشان تبدأ صح تمشي في الاتجاه اللي يناسبك من غير تضييع وقت أو إحباط.طيب ليه السؤال ده؟
لأن أغلب اللي بيسألوا دايما عن مجال UX بيكون كلامهم عن حاجة تاني وغالبا بيقصدوا UI ودي مرحلة من مراحل UX لأن بيكون المقصود تصميم الواجهات والشاشات أوالجزء الخاص بال Wireframes و Prototype.. يعني جزء التصميم بس .. وإحنا وضحنا في البوست اللي فات إن UX فيها بحث وتصميم واختبار. وكتير من الناس مش بيحب جزء البحث ده وبيحب أكتر جزء التصميم.
طيب إيه الفرق بين UX و UI علشان أقدر أحدد؟
ببساطة في البوست ده هنحدد الفرق ده في نقاط:
تصميم واجهة المستخدم أو UI هي مرحلة من مراحل تصميم UX ، وهي المرحلة الكرييتيف اللي في الموضوع اللي بنبدأ فيها نتعامل مع الألوان والخطوط والأنيميشن والترانزيشن وبنتعامل مع الهوية البصرية والبراندنج.
لكن UX ده اسم البروسيس كلها من أولها لآخرها من بداية البروجكت لغاية التسليم. واللي واجهة المستخدم جزء منها، واللي بتبدأ بعد الاستقرار على النماذج النهائية للـ Wireframe و Prototype.
لو افترضنا ان التطبيق أو الموقع ده شقة، نقدر نقول أن UX هو شغل مهندس العمارة ، وUI شغل مهندس الديكور والتصميم الداخلي.
تصميم UX بيخطط للمبنى وأفضل أماكن المداخل والمخارج والغرف ودورات المياه وأماكن الكهرباء والتكييفات والسباكة، كل ده بما يناسب أفضل شكل لراحة الساكن، لكن UI هو شغل التشطيبات اللي هو غالبا الجماليات وإضفاء روح على الشقة، الألوان والديكورات والإضاءة وهكذا.
لما نتكلم بقى تحديدا عن تجربة المستخدم UX وواجهة المستخدم UI:
باختصار نقدر نقول:
تجربة المستخدم – كيف تشعر UX – How it feels.
واجهة المستخدم – كيف تبدو UI – How it looks.
واجهة المستخدم UI هي المحتوى.
تجربة المستخدم UX هي السياق.
إذا كانت واجهة المستخدم UI هي شكل الوجبة.
فإن UX هو مذاقها.
طيب في سؤال دارج دايما بيتسأل:
هل ممكن أكون مصمم UI مش UX؟
أيوة طبعا عادي، هو المفروض أصلا أن في المشروعات الكبيرة كل مرحلة ليها متخصص فيها من البحث لمصمم UI. بس دايما يفضل كل واحد فيهم يكون عنده إلمام عن البروسيس كلها علشان يحصل تناغم في العمل بينهم وده يأثر بشكل إيجابي على نتايج المشروع.
كده نكون فهمنا الفرق بين التخصصين وإن شاء الله في البوست الجاي نتكلم عن الجزء التاني من إزاي أبدأ في مجال UX.