في البوست ده هنتكلم عن الموضوع رقم 4 في موضوع: إزاي أبدأ في مجال UX؟
هنتكلم فيها عن :
سمات مصمم UX
يعني الصفات اللي لازم تكون في شخصية مصمم UX الناجح
مصمم UX وظيفته الأساسية وهدفة أنه بيحل مشاكل يعني Problem Solver
ده هدف التصميم لتجربة المستخدم
هو دراسة وتحليل احتياجات المستخدم وأهداف البزنس
وبعدها بيحدد المشاكل
و يبدأ يضع حلول
وبعدها يختبر
ويستمر مع الوقت في المتابعة والتطوير
علشان كده أساس تجربة المستخدم هو حل المشكلات Problem Solving
وحل المشكلات المتعلقة بالبشر عموما بيكون أساسها أنك بتتعامل مع السلوك الإنساني
فمصمم تجربة المستخدم في الأساس بيتعامل مع الناس وبيحل مشاكلهم
وبيتعامل مع التكنولوجيا
وبيحاول يوفق بينهم بحيث يستخدم التكنولوجيا لحل مشكلة المستخدم
وده بيتطلب منه مهارات إنسانية زي فهمه لسيكولوجية الناس وللحاجات وللسلوك
وبيتطلب برضه فهمه للتكنولوجيا الحالية.
فمع استمرار تطور التكنولوجيا ومعدلات النمو السريع
هيكون مهمة (حل المشكلات ) أكثر طلبا من فكرة التصميم
لأن التصميم الجمالي مع الوقت ومع التطور هيكون ممكن شراءه
علشان كده فكرة الموقع أو التطبيق اللي بيتصمم بشكل جميل مش هيكون ميزة
لأن أصبح مع التطور ليه حلول ومكتبات جاهزة يمكن توفرها بسهولة
وعلى العكس لا يمكن شراء (حل مشكلة ) أو شراء مكتبات جاهزة ليها
ولا يمكن تنفيذها إلا من قبل شخص لديه المهارات المناسبة
وهيكون المنتج اللي بيحل مشاكل المستخدم وفي نفس الوقت بيحقق أهداف البزنس دايما ميزة تنافسية
فلما تفكر في القيمة الحقيقية المميزة اللي تقدر تقدمها للمستخدم والشركة كمصمم UX
هيكون (حل المشكلات) هو مهارتك الأولى
بالإضافة طبعا لتوابعها من متابعة وتطوير باستمرار مع التغييرات اللي بتتحدث مع الوقت.
وحل المشكلات بتتطلب سمات معينة لشخصية مصمم UX زي :
1- أنك تكون (متعاطف)
فلو معندكش القدرة على التعاطف مع الناس
فمهنة مصمم UX مش مجالك
لأن التعاطف مع المستخدم هو أساس عملية تصميم UX
والمستخدم هو محور اهتمامك
فالمقابلات مع المستخدمين
وعمل الاستبيانات
واختبار قابلية الاستخدام لأي منتج
وفهم دوافع المستخدم وأهدافه واحتياجاته
وإيجاد طرق لحل كل مشكلة
كل ده ضمن التعاطف
وهو أنك بتشوف كل حاجة بعين المستخدم
بتحط نفسك مكانه وتشعر بمشاعره في أي تجربة
وده بيخللي التعاطف سمة أساسية لمصمم UX.
طبعا ده غير أن مصمم UX مش بيتعامل بس مع المستخدمين
لكن بيتعامل مع فريق عمل كامل بيؤدوا أدوار مختلفة في البروجكت
وبيتعامل مع مديرين وموظفين
وطبعا بيتعامل مع مصممين ومبرمجين ومطورين
وكمان بيتعامل مع أصحاب المصلحة أو الشركات اللي بتنفذ التطبيق أو المنتج وبيحتاج يفهم أهدافهم.
2- لازم تكون (فضولي)
بصفتك مصمم UX ، لازم تكون مهتم باللي بيحصل حواليك
ازاي الحاجات بتشتغل وازاي الناس بتتعامل معاها
التطور في حاجات الناس وتطور متطلباتهم وازاي بيتعاملوا معاها
لأن جزء كبير من مهمة مصمم UX هو اكتشاف ليه الناس بيعملوا الحاجة دي
وازاي بيعملوها علشان يكون قادر على الفهم وتقديم الحلول
لازم يكون متابع دايما للتطورات اللي بتحصل حواليه للمنتجات
ورأي الناس الإيجابي والسلبي عنها
وليه في منتجات نجحت ومنتجات تاني فشلت
وليه الناس بتستخدم منتج عن منتج تاني
ده بيخللي مصمم UX عند قدرة على التحليل ووضع الفرضيات.
3- لازم يكون عندك القدرة على (التواصل)
مهارات التواصل أساسية لمهنة مصمم UX
لأن من مهامه الأساسية لتحقيق أهدافه أنه يتواصل مع فئات مختلفة
بيتواصل مع الشركات علشان يعرف أهدافهم
بيتواصل مع المستخدمين علشان يشوف مشاكلهم واحتياجاتهم
بيتواصل مع أفراد فريق العمل في البروجكت
ممكن يتواصل مع موظفين ومديرين في مؤسسات مختلفة .. وهكذا …
التواصل ده بيكون مع مستويات مختلفة في الشركة من أصغر موظف إلى المدير
التواصل مع مستخدمين مختلفين في المستويات الثقافية والاجتماعية والجغرافية
مختلفين في الوظائف والاهتمامات
في الأعمار وهكذا …
فمهارات التواصل الناجحة هتؤدي للقيام بإجراءات وخطوات ناجحة مع كل الأطراف المختلفة اللي ليها علاقة بالمشروع
والتواصل الناجح ده هيؤدي لنتايج أكثر دقة في البحث وبالتالي في حل المشكلات.
وبرضه في مهارات تانية لازم يتسم بيها مصمم UX
زي القدرة على إدارة المشروعات وإدارة الوقت والقيادة والعمل ضمن فريق
والقدرة على تحديد الأهداف والتخطيط.
شكرا ليهم ونلتقي البوست الجاي هنجاوب عن السؤال: إزاي أبدأ في مجال UX؟ بعد ما وضحنا بعض المفاهم الأساسية.