اهتمامك بالمصطلحات وانتقائك للكلمة المناسبة من أهم العوامل التي بتبني ثقة العميل فيك كمصمم أو كوكالة، وبتكون علامة على أنك بروفيشنال، علشان كده ضروري دائما نبحث عن المصطلحات الأدق في وصف ما نقوم به من عمل، ومن ضمن المصطلحات دي واللي هنتكلم عنها هي مصطلح (الهوية البصرية) وهي (Visual Identity).
أول مصطلح: البراندنج – Branding
البراندنج مش هو الهوية البصرية، لكن هو مصطلح أكبر من مجرد الهوية البصرية ، والهوية البصرية جزء من البراندنج ، لأن البراندنج ليه شقين: شق تسويق وشق تصميم ، والشق الخاص بالتصميم هو اللي بنسميه الهوية البصرية.
تمام، يعني هل الهوية البصرية هي التصميمات زي: تصميم البزنس كارد والليترهيد والفولدر والأظرف والغلاف ومنشورات السوشيال ميديا والأيقونات واستيكر السيارة والتيشيرت وواجهة الموقع… وهكذا؟
لا برضه، دي اسمها القرطاسية Stationery، ودي مش الهوية البصرية ، لكن دي حاجات بنستخدم الهوية البصرية علشان نصممها.
أمال إيه الهوية البصرية ؟
الهوية البصرية هي أننا نحدد عناصر الشكل اللي نقدر من خلاله نتعرف على البراند أو المنتج من خلال مجرد الرؤية، فمثلا: بنحدد اللوجو، واللون أو الألوان اللي بتعبر عن البراند زي مثلا اللون الأحمر للنادي الأهلي، أو اللون البرتقالي لشركة أورانج، أو اللون الأزرق لفيس بوك… وهكذا.
بالإضافة للألوان بنحدد الخطوط اللي هي التايبوجرافي، يعني ازاي نستخدم الخطوط ومقاساتها وأوزانها، إيه الخطوط الخاصة بالعناوين، وإيه خاص بالنصوص وهكذا.وبنحدد الخلفيات في حالة الفاتح أو الغامق أو لو صورة.بنحدد الأشكال المختلفة والمتاحة لألوان اللوجو واستخدامه.بالإضافة للباترن والصور والأشكال وغيرها… أي حاجة تتحدد تعبر عن هوية البراند البصرية، وتكون في دليل مكتوب وواضح نستخدمه في تنفيذ أي منتج مرئي كمرجع لأي حد بيتعامل مع البراند علشان يمشي على نفس التعليمات وبالتالي تكون كل منتجات ومخرجات البراند متشابهة ونحافظ على شكل ثابت في ذهن العميل.. والدليل ده ليه كذا اسم وكلهم حاجة واحدة زي مثلا:
Brand Book
Brand Guidelines
Brand Identity Guidelines
Brand Style Guide
فمثلا لو طبعنا بزنس كارد أوكتبنا خطاب أو عقد أو عملنا إعلان في الشارع أو عملنا بروفايل للشركة أو عملنا ستيكر للسيارات أو عبوة للمنتج أو كيس بلاستيك، حتى لو في خلال أوقات مختلفة ولو نفذها مصممين غير بعض مش مصمم واحد هتلاقى فى الاخر كل التصميمات شبه بعض وكأن اللي نفذهم مصمم واحد.
ليه؟
لأن كل واحد منهم استخدم دليل الهوية البصرية للبراند في تنفيذ التصميم بتاعه، فعنده الألوان وأكوادها، والخطوط بأوزانها ومقاساتها، والخلفيات والأيقونات والباترن والصور والأشكال الهندسية وهكذا، بحيث ان كل ما يخص البراند يظهر بشكل واحد وثابت مع الوقت في أذهان العملاء.
وإذا حابب تتعرف أكتر على البراندنج والهوية البصرية ممكن تلاقي كل الأساسيات في كورس أساسيات البراندنج المجاني على يوديمي Udemy: