في البوستين اللي فاتوا اتكلمنا عن أول مفهومين من 3 مفاهيم محتاجين نوضحهم
علشان نعرف إزاي نبدأ في مجال UX
أول مفهوم : الفرق بين UX و UI
تاني مفهوم: الفرق بين التقنيات والأدوات
وفي البوست ده هنتكلم عن :
هل تصميم UX علم ولا فن؟
ليه السؤال ده ده تحديدا ؟
علشان عدم فهمنا للإجابة الصحيحة هيخلينا نشتغل UX بطريقة مش صح أبدا
في الأول نعرف يعني إيه علم ويعني إيه فن في نقاط:
العلم يعني أرقام
الفن يعني مشاعر
الفن هدفه التعبير عن الذات أو الرؤية الشخصية وإثارة الفكر والعواطف
العلم هدفه يحل المشاكل
نتيجة الفن بشكل أساسي دوافعها شخصية
لكن التصميم عملية منهجية تعتمد على البيانات
الفن بيكون تعبير وتحيز لوجهة نظر الفنان
التصميم الجيد غير متحيز لوجهة نظر المصمم، ويقدم ما يحتاجه الناس
طيب بعد ما عرفنا الفرق بين العلم والفن
تعالوا نشوف تصميم UX تحديدا وظيفته إيه وبناء عليه نحدد
هل هو علم ولا فن؟
تصميم UX يشبه التجربة العلمية اللي بتتعمل في المختبرات والمعامل
بيعتمد على الدراسة والتجربة والفرضيات والنتايج والاختبارات
وإلا مش هيكون مفيد أبدًا للشركات أو المستخدمين
ومن غير كده يبقي فقد هدفه
علشان كده إحنا بنجمع البيانات زي بيانات واحتياجات المستخدمين
وبيانات عن أهداف الشركات وأصحاب المصلحة
وبيانات عن المنافسين
ونبدا في تحليل البيانات
تحديد المشاكل والاحتياجات
تصميم سكتشات مبدئية مناسبة
اختبار المنتج المبدئي
تقديم تقارير والحصول على feedback
وهكذا
وبناءا عليه بيكون الهدف الرئيسي من البيانات دي
هو تطوير منتج مع وضع العميل أو المستخدم في الاعتبار
الهدف النهائي هو خلق رضا العملاء بشكل أفضل
وتصميم منتجات مفيدة وسهلة الاستخدام وتقدم قيمة للعميل
فالموضوع واضح أنه علمي مادام بيعتمد على قواعد البحث وتقديم الحلول
وبنلاقي ان اثناء تصميم واجهة الويب أو التطبيقات
بيكون تركيز مصمم UX الأساسي مش علي الجزء الجمالي
ولكن لتحديد كيفية استخدام المستخدم للمنتج
وإزاي يقدم تجربة ممتعة للمستخدم واستمرارية
في النهاية بيكون هدف عملية التصميم هو تقديم حلول للمشاكل
مش مجرد تقديم لوحة فنيه مش ذات جدوى وصعبة الفهم ومعقدة في الاستخدام
بالتأكيد ، يلعب التصميم الجمالي والعاطفي جزء من تصميم UX
لأن الجمال والألوان والخطوط والصور جزء من تجربة المستخدم
ولكن في تصميم بتكون تحت إطار برضه علمي وضوابط وقواعد
بتكون غالبا مبنية على نتايج البحث
زي أفضل الألوان للبراند أو المريحة للمستخدم
زي أفضل الصور المستخدمة أو الرسوميات
بتكون برضه نتيجة البحث مش وجهة نظر المصمم
في النهاية لازم الناحية الجمالية تكون في حدود التصميم وسياق الاستخدام
وده غالبا بيكون مش من خصائص الفن اللي في أغلب الأحيان مش بتحكمه قيود ولا حسابات ولا نتايج أبحاث
شكرا للمتابعة ، ونلتقي إن شاء الله في البوست الجاي : سمات وخصائص مصمم UX.