User Journey Map خريطة رحلة المستخدم هي عبارة عن مخطط بيوضح رحلة المستخدم مع منتج أو خدمة بشكل عام ، بنرسم خريطة لمسار المستخدم من أول ما يتعرف على المنتج أو الخدمة لغاية نهاية تجربته، زي إتمام عملية الشراء أو التسجيل في موقع أو تطبيق أو الوصول لمعلومة وخلافه.
الهدف الأساسي من User Journey Map هو مساعدة مصمم تجربة المستخدم على فهم احتياجات وتوقعات المستخدم وتفضيلاته وسلوكياته، وبالتالي اتخاذ قرارات أفضل في عملية التصميم.
كمان بيساعد في تحديد الفجوات الموجودة في العملية كاملة، والتفاعلات الغير منطقية أو المحبطة، والمناطق اللي المستخدم ممكن فيها ينسحب وميكملش عملية الشراء أو التفاعل مع المنتج بشكل عام.
مراحل رحلة المستخدم User Journey Map بيكون فيها أكتر من مرحلة وهي الخطوات اللي المستخدم بيمشيها متفاعلا مع المنتج، و دي بعض المراحل الشائعة في ال User Journey:
- الوعي Awareness : المستخدم بيتعرف على المنتج أو الخدمة من خلال البحث أو انه يشوف إعلان وخلافه.
- الاهتمام Consideration: المستخدم بيبدأ يهتم بالمنتج أو الخدمة ويحطه في الاعتبار ضمن الاختيارات وبيقارنه بخيارات تانية شبيهة مع منافسين آخرين.
- الشراء Purchase: المستخدم بيقرر يشتري المنتج أو الخدمة.
- التفاعل Engagement: المستخدم بيبدأ يستخدم المنتج أو الخدمة وبيتعلم طريقة استخدامها ويحقق أهدافه.
- الدعم Support: المستخدم ممكن يحتاج دعم أو مساعدة في استخدام المنتج أو الخدمة.
- الولاء Loyalty: المستخدم يستمر في استخدام المنتج أو الخدمة وممكن يكون عميل دائم.
- الترويج Advocacy: المستخدم بيرشح المنتج أو الخدمة للآخرين.
دي مش كل المراحل اللي ممكن تكون في ال User Journey وممكن تختلف حسب نوع المنتج أو الخدمة، بس ده نموذج عام لمفهوم رحلة المستخدم.